З надыходам восені ў гарадах і вёсках праходзяць кірмашы. У нашым дзіцячым садзе таксама адбыўся “Восеньскі кірмаш”. Пачалася музычная забава з выканання дзецьмі беларускай песні “Прывітальная”. У вершах дзеці славілі людзей працы, сапраўдных гаспадароў, якія вырасцілі і сабралі багаты ўраджай.
Нечаканым і радасным для дзяцей быў прыход да іх у госці бабулі Алены. Усе разам яны адправіліся на кірмаш, дзе было багата ўсяго: саматканых ручнікоў, абрусаў, вышыванак, вырабаў з лазы, саломы, на паліцах багаты ўраджай бульбы, морквы, буракоў, кабачкоў, цыбулі, сакавітых яблыкаў і вінаграду, духмяных груш.
Павесяліліся дзеці ад душы. Яны спявалі беларускія песні пра восень, танцавалі народныя танцы “Янка”, “Кракавяк”, вадзілі карагоды, гулялі ў народныя гульні “Бабка Еўка і дзед Талаш”, “Бульба”, дапамаглі для бабулі Алены разгадаць цэлы мех загадак пра ўраджай. З развітальным словам і найлепшымі пажаданнямі звярнулася бабуля Алена да дзетак:
“Край свой любіце!
Не таму любіце, што за ўсё цяплейшы,
а таму любіце, што за ўсё мілейшы, за ўсё прыгажэйшы!”
Задаволеныя, з пачастункамі вярталіся дзеці з кірмашу ў свае групы.